12/03 2026

ArcticExpo Kalaallit Nunaanni aalisarnermut, piniarnermut nutaaliornermullu qitiusunngorpoq

ArcticExpo Nuummi aallartingajalerpoq. Aalisarnermik piniarnermillu suliaqartut, inuussutissarsiortut, aalajangiisartut saqqummersitsisullu Inussivimmi maajip tallimaanniit arfineq-aappaanut takussaassapput.

ArcticExpo Kalaallit Nunaanni Issittumilu aalisarnermik piniarnermillu inuussutissarsiuteqartunut kateriffiuvoq nutaaq. Saqqummersitsinermi attaveqatigiinneq pilersinneqassaaq, teknologii nutaaq tunisassiallu saqqummiunneqassapput, aamma aalajangiisartut inuussutissarsiortullu tamaneersut katersuutissallutik

Ulluni pingasuni peqataaneq niuernikkut attaveqaatitigullu allannguutaasinnaasoq

ArcticExpo Kommuneqarfik Sermersuup AKKC-llu suleqatigiinneratigut pilersinneqarpoq. Issittumi piniarneq, aalisarneq nutaaliornerlu pingaarnertut sammineqarlutik Nuummi ulluni pingasuni ingerlanneqassalluni.

AKKC Ilulissani PolarExpomik – Nunatsinni aalisarnermut piniarnermullu saqqummersitsinermik ilisimaneqarluartumik – aamma Aalborgimi DanFish Internationalimik, nunarsuarmi aalisarneq pillugu saqqummersitsinerit annersaata ilaannik, aaqqissuisuuvoq.

– Kommuneqarfik Sermersuumik suleqateqarnerput tulluusimaarutigaarput. PolarExpo-mi DanFish Internationalimilu nunanit tamalaanit peqataaffigineqartumik misilittakkatta, najukkami nunarsuarmilu soqutigineqarluartartumik saqqummersitsinissamik pilersitsinitsinnut tunngavissaqarlualersippaatigut, AKKC-mi pisortaq Nicolaj Holm oqarpoq.

Saqqummersitsisut 50-it saqqummiinerillu soqutiginartut

Kalaallit Nunaannit, Savalimmiuniit, Islandimit Danmarkimiillu 50-it missaanniittut saqqummersitsissapput, aamma pisussarpassuaqarluni. ArcticExpo ilisimasanik avitseqatigiinnermut, suleqatigiinnernut nutaanut piujuartitsisumillu aaqqiissutissarsiorfittut atorneqassaaq – Nuullu aalisarnermut, piniarnermut nutaaliornermullu qitiusutut siuarsarnissaanut iluaqutaassalluni.

Siullermik 2026-mi maajip tallimaaniit arfineq-aappaanut, aappassaanik 2027-mi, tamatumalu kingorna ukiut allortarlugit – Ilulissani PolarExpop aaqqissuunneqarnera allortarlugu – ingerlanneqassalluni.

Billeti pisiariuk